محجبة .. رغم أنوفهم - تعقيب

خلصت قصة نادين ..

لكن في عندنا مليون نادين و أكتر في حياتنا ..

نادين .. واحدة من ناس كتير فطرتهم صافية أوى ..

لكن .. ما وصلتلهومش المعلومة .. بل و الأشد .. إن بيوصل لهم كلام مش مظبوط عن الحجاب ..

الحجاب إرهاب ..

الحجاب جهل ..

الحجاب تخلف ..

معلومات ناقصة و غير كاملة عن الحجاب ..

لازم كل واحدة مسلمة محجبة حجاب سليم تحاول على الأقل في المحيط اللي حواليها ..

إخواتها .. قرايبها .. أصحابها ..

أولا .. تكون قدوة

ثانيا .. تتكلم عن الحجاب و تصحح صورته السيئة للأسف عند الناس بسبب إعلامنا الأكثر من سيئ ..

ثالثا

.. الدعاء لكل بنات المسلمين بالحجاب

كلمة قريتها و عجبتني جدا

لو كان الإسلام يمنع المرأة من الخروج للمشاركة في بناء المجتمع لما كان هناك داع أصلا لذكر الحجاب في القرآن الكريم..

************************************

إلللي دفعني إني أكتب القصة دي .. رغم إن أسلوبها ركيك نوعا ما ..

إللي بيجرى حوالينا عن الحجاب ..

الحجاب بكل أشكاله ..

في تونس ..

يمنع الحجاب من المدارس تماما ..

ممنوع واحدة تدخل المدرسة بالحجاب ..

في مصر ..

ممنوع واحدة تدحل الإمتحان بالنقاب .. حتى الأزهر.. و حتى في السعودية في بعض المستشفيات منعت النقاب فيها …

طب سؤال واحد ليكم يا مسئولين؟

لو بنتك هي إللي في الموقف دا ..

لو شيخ الأزهر في مصر بنته منتقبة .. كان هيرضى ينزل القرار دا؟

لو وزير التعليم في تونس بنته محجبة .. كان هيرضى يمنع الحجاب في المدارس بالشكل دا؟

الله أعلم ..

ممكن يدوسوا على كل حاجة في سبيل المنصب و الكرسي ..

لكن .. إيه نهاية الشيء الهلامي إللي هما ماسكين فيه دا؟

لا شيء ..

مجرد حادثة سيارة ممكن تنهي حياته كلها زي والد نادين

مجرد أي مشكلة صغيرة في البلد تؤدي لإنهاء حياته المالية و السياسية ..

و لا يعلم جنود ربك إلا هو .. و ما هي إلا ذكرى للبشر ..

الفتن اللي جايه أصعب و أشد .. و ربنا يعيننا عليها و يرحمنا و يرحم أولادنا و أحفادنا منها ..

قال رسولنا الحبيب صلى الله عليه و سلم:

( بَادِرُوا بِالأَعْمَالِ فِتَنًا كَقِطَعِ اللَّيْلِ الْمُظْلِمِ ، يُصْبِحُ الرَّجُلُ مُؤْمِنًا وَيُمْسِي كَافِرًا ، أَوْ يُمْسِي مُؤْمِنًا وَيُصْبِحُ كَافِرًا يَبِيعُ دِينَهُ بِعَرَضٍ مِنْ الدُّنْيَا ) رواه مسلم

ربنا يرحمنا ..

تعرفوا إن في حملات ضد الحجاب على الإنترنت و في الشوارع و الكافيتيريات ؟؟

… هذه فتن آخر الزمان ..

ربنا يعيننا عليها يا رب

لا تظلمنَّ إذا ما كنت مقتدراً

فالظّلم مرتعه يفضي إلى الندم

تنام عينك والمظلوم منتبه

يدعو عليك وعين الله لم تنمِ

****************************************

كلمة أخيرة ..

ما تستهونيش بكلمة بسيطة رقيقة تقوليها لواحدة لما تتحجب

و لا تستهوني بنصيحة جميلة تقوليها لواحدة عن الحجاب ..

و لا تستصغري أي هدية و لو بسيطة تديها لواحدة عملت و لو خطوة واحدة تجاه الحجاب ..

في فكرة .. كان نفسي أعملها من زمان .. و ما زلت بافكر فيها ..

كان نفسي أعمل كروت و أكتب فيها كلمة رقيقة .. زي مثلا

جزاك الله خيرا على ارتدائك للحجاب و نصر ديننا

وحتى لو أنا في الشارع و لقيت واحدة لبسها كويس و محجبة أديها الكارت دا من أجل الحب في الله فقط

تخيلوا لو واحدة كانت عاوزة تقلعه

و لا واحدة مش مقتنعة بيه

و لا واحدة بتزن على ودانها إنها تقلعه ..

و فجأة لقيتك جنبها و بتسانديها بكلمة بسيطة زي دي

مش عارفة .. حاسه إنها هتعمل فرق .. على الاقل على التثبت على الحجاب

و ممكن هي كمان تعجبها الفكرة و تعمل زيها و تديها للي حواليها ..

هنلاقي في الآخر رابطة حب في الله كبيرة أوى بتجمع بنات المسلمين سوا

حب الحجاب ..

التثبت على الحجاب ..

الأمر بالمعروف لصالح الحجاب

في واحدة صاحبتي كنت بتكلم معاها على منع النقاب في الجامعات ..

وبعدين قالت لي إن في بنات منتقبات لما قالولهم ما تدخلوش اللجان راحوا مشيوا بشويش و ما دخلوش و خلاص ..

فبتسألها هو إللي إحنا عملناه دا صح و لا لأ …

قالت لها كلمة قوية جدا و عجبتني أوى .. قالت لها أنا مش موافقة على إللي عملتوه .. لإن مجرد استسلامك مش هيخليني انا كمان ألبسه .. هقول و انا مالي و مش هحس بأهميته ..

و هي دي قضية الحجاب عامة ..

دوري إيه بعد ما لبسته؟ ..

هو دا الأهم

لذلك كنت حابه أختم قصة نادين إنها لما اتحجبت ما قالتش خلاص أنا و ما بعدي الطوفان ..

لكن فكرت إزاي تقول للناس برضو عن الشيء الغالي الجميل إللي ربنا إداهولها و هو الحجاب ..

ودا دور كل واحدة أنعم الله عليها بالحجاب ..

مطلوب مننا إننا نعمر الأرض مش إننا نهتم بنفسنا و بإنقاذ نفسنا من المهالك و بس

إنتو عارفين الصور إللي عن المحجبات إللي في المدونة دي منين؟

دي ماليزيا ..

نزلت صور أنمي للحجاب عشان الناس ..

جزاهم الله خيرا كثيرا على مجهودهم ..

*******************************************

أنا عارفة إن القصة كانت طويلة ..

حتى التعقيب كان طويل :D

بس لو حد حابب يضيف تعليق إيجابي أوسلبي على القصة أنا هاكون شاكرة جدا

و انتظروني في تاني إصدار آياتي على المدونة بإذن الله

و السلام عليكم