محجبة … رغم أنوفهم جــ1

بسم الله الرحمن الرحيم

أهدي هذه القصة إلى كل من ترددت في ارتداء الحجاب خوفا من كل القيود التي تشعر بها المحجبات في عصرنا الآن ..

أهديها لكل المحجبات اللاتي يعانين في وقتنا الحالي بسبب الحجاب…

أهديها لكل أب حرم ابنته من ارتداء الحجاب خوفا على المنظر العام …

أهديها لكم جميعا

***********************************

جلس رياض بيه رجل الأعمال المعروف إلى كرسي مكتبه .. فقد وصل في التو و اللحظة .. و جرى خلفه أستاذ إسماعيل سكيرتيره الخاص كي يوقع على بعض الأوراق المتأخرة ..

مال أستاذ إسماعيل إلى رياض بيه  وهو يقلب الورق بين يديه و قال: دي صفقة الحديد اللي هنستلمها النهارده من مخازن الدولة .. فاضل امضة حضرتك عليها يا فندم

ابتسم رياض بيه ابتسامة خبيثة و قال: دقعت المليون الباقي عشان الصفقة يا إسماعيل؟

رد أستاذ إسماعيل بابتسامة خبيثة أيضا و قال:أكيد يا باشا .. أومال كنا هنستلم الحديد من غير بعض الرشاوى البسيطة إللي هتسهل لنا نقل الحديد لمخازننا بنص التمن

قال رياض بيه غاضبا: ما تقولش رشاوي يا إسماعيل .. دي شويه عمولات بندفعها عشان نخلص صفقات ناجحة للبلد .. و دا مش حاجة حرام يعني و لا إيه يا إسماعيل؟

قال إسماعيل مترددا:أكيد يا باشا .. أكيد طبعا

قال رياض بيه محييا إسماعيل: بيعجبني إنك بتفهمني بسرعة يا إسماعيل ..

ابتسم إسماعيل مرة أخرى و قال: تلامذتك يا رياض بيه

تذكر إسماعيل أمرا مهما فمال مرة أخرى إلى رياض بيه و قال: نسيت أقول لحضرتك إن الصحفية إللي جت إمبارح مستنية حضرتك بره و منتظرة مقابلة حضرتك ...

رياض بيه: صحفية؟!! .. مش دي البنت المحجبة إللي من جريدة الرأي الحر؟

إسماعيل : أيوه حضرتك .. أقول لها إيه؟

ظل يفكر رياض بيه قليلا ثم قال:معرفش ليه بيغطوا شعرهم و يلبسوا ملابس واسعة .. في القرن العشرين و لسه في ناس بتلبس حاجات مالهاش معنى غير إنهم جهلة .. لا حول و لا قوة إلا بالله

رد إسماعيل كي يقتنص حب رياض بيه:الإيمان في القلب يا رياض بيه .مش كده؟

نظر رياض بيه نظرة إعجاب لإسماعيل و قال: عفارم عليك يا إسماعيل .. تعجبني ..

************************************

فلنبتعد قليلا عن هذا المشهد .. و نذهب إلى إحدى الجامعات الخاصة .. حيث تجلس نادين مع مجموعة بنات هن (شلتها) .. لا يوجد فيهن فتاة محجبة .. و على الرغم أن نادين من عائلة (هاي) جدا .. و لكنها تدرك جيدا أنه ليس من الجيد مصاحبة شباب .. فمن الممكن أن تتعامل معهم في بعض الأمور الخاصة بالكلية و لكن صحوبية أو زمالة ……. لا تعتقد في ذلك ..

تجلس نادين وسط الشلة و ضحكاتهن تعلو و تزيد .. عدا دينا التي لها مدة طويلة على هذا الوضع ..

قالت نادين: أنتِ نكتة متحركة يا رشا ..  إنتي بتجيبي النكت دي منين يا بنتي؟..

ردت رشا: من الإنترنت يا حبيبتي ..الإنترنت مليااااان بكنت أكتر من دي كمان..  هاديكي شويه مواقع هتهلكي من الضحك لما تفتحيهم..

نظرت دينا إلى الطاولة المجاورة وجدت بعض الفتيات المحجبات يجلسن ويتضاحكن سويا أيضا و لكن بأصوات منخفضة أكثر منها ملفتة لنظر المارة ..

فقالت دينا: هو إيه رأيكم في الحجاب؟

ضحكت رشا و قالت:إيه يا دينا؟ .. بقالك فترة مالكيش كلام غير على البتاع دا إللي اسمه الحجاب .. و كإنك بتسألينا عاملين إيه في مادة الإحصاء

ضحكت الفتيات كثيرا و قالت نهى:أعتقد إن الحجاب دا نوع من أنواع التخلف .. مالوش علاقة لا بالتطور و لا بالتقدم إللي عاوزين البلد تبقى فيهم .

أكملت نادين كلام نهى و قالت: أنا مامي قالت لي إن الحجاب دا بيلبسوه البنات إللي عندهم عيوب في شعرهم و جسمهم .. عشان كده بيلبسوا حجاب يداروا العيوب دي ..

دينا: بس أنا حاسه إن الحجاب دا فرض في الإسلام .. محدش فيكم سمع حلقة عمر خالد عن الحجاب؟

ردت رشا ساخرة: مين عمر خالد دا يا دينا .. و بعدين إحنا بنعمل إيه بس يغضب ربنا .. أرجوك انزلي من على وداننا بقى .. إحنا عاوزين نفرفش و نخرج من همومنا .. مش إنتي إللي باباكي طلق مامتك و سافرت و سابتك مع جدتك ….و ….

و قبل أن تكمل رشا كلامها ردت نهى لإيقاف هذا النزاع الغير مقبول في الشلة: هاي هاي يا بنات .. انسوا بقى الكلام دا .. و بعدين إحنا عاوزين نستمتع بحياتنا فبلاش نتكلم في الأمور التافهة دي و نختلف عليها .. ها يا بنات سهرتنا هتبقى فين النهارده؟

قالت دينا: أعتقد أن حفلة هيثم ميعادها النهارده ..

قالت نادين:معتقدش إني هقدر أحضر الحفلة النهارده ..

قالت دينا : و أنا برضو مش هقدر ..

ردت نهى بغضب:ليه يا بنات؟ .. إنتو هتضيعوا فرصة كبيرة أوى ليكم النهارده .. حفلات هيثم دايما جنان ..

قالت نادين: حفلة النهارده هتخلص الساعة اتنين الصبح .. و مامي مش هترضى توديني

و قالت دينا: مش هقدر أروح لبيت هيثم .. دا حاجة مش صح خالص ..

قالت رشا في غضب: و إيه يعني يا دينا ..هنروح لبيت هيثم و نعمل حفلة حلوة و نستمتع شويه و خلاص .. و بعدين شباب الكلية محترمين و مش هيعملوا حاجة تزعلنا أبدا ..

قالت نهى كي تبعد هذا الخلاف بين الفتاتين: و أنت يا نادين .. دا إنتي رياض بيه يعني عنده سواقين بعدد شعر راسك .. مفيش حد فيهم يقدر يوصلك يعني؟

قالت نادين: بابي مش هيوافق .. دا لو عرفت أساسا أشوفه النهارده ..

قالت نهى:ليه؟ .. هو هيتأخر في الشغل زي كل يوم ؟

قالت نادين:أكيد يا نهى ..والدي معندوش غير شغله و بس .. و أي حاجة تانية مش مهم ..

بعد مناقشات دامت لبضع دقائق .. لم يجدي أي حل لذهاب نادين أو دينا مع الشلة إلى الحفل الليلة .. فقامت و تركتهن حيث أن السائق منتظرها بالخارج .. وقامت دينا معها أيضا

************************************

و في الطريق إلى البوابة .. تحدثت نادين إلى دينا قليلا .. فهناك أسئلة كثيرة تدور في رأسها منذ فترة و تحتاج إلى إجابة من دينا عليها ..

بدأت نادين حديثها و قالت: أنا حاسه يا دينا إن في حاجة ملخبطاكي أوى اليومين دول .. كل ما نقعد مع بعض ما تتكلميش غير عن الحجاب و بس .. مالك يا حبيبتي؟

نظرت دينا إلى الأرض في ألم و أسى .. و قالت لنادين:حاسه إني مفتقدة حاجة كبيرة و مهمة أوى في حياتي .. من فترة كده بنت خالتي ادتني شريط بيتكلم عن الحجاب و سمعته كذا مرة .. حاسه إني لازم ألبس الحجاب.. إيه رأيك يا نادين؟

صدمت نادين بموقف دينا .. فالحجاب بالنسبة لشلتهم أمرا غير قابل للمناقشة حتى .. و لكن بما أن نادين أقرب صديقة من الشلة لدينا .. فقررت أن تتحدث إليها بهدوء بعض الشيء

و قالت:هقولك رأي مامي في الموضوع دا يا دينا .. آخر مرة كلمتينا عن الحجاب روحت كلمت مامي في الموضوع .. و قالت لي إن الإيمان بربنا دا في قلوبنا مش بلبس الحجاب .. و بعدين إحنا الحمد لله بنصلي و بنصوم في رمضان و بنعمل كذا ختمة في رمضان برضو .. يعني ليه نتحجب؟!! .. مالوش لازمة بجد .. و بعدين الحجاب هيعمل لنا إيه يعني؟ .. هيخلي بابي يرجع يتكلم معايا زي الأول تاني .. و لا هيخلي مامتك ترجع من السفر و تحضنك زي زمان؟ .. أنا حاسه إنك لازم تفكري شويه قبل قرار خطير زي كده .. و بعدين إنتي مش بتشوفي التفتيش إللي بيحصل للمحجبات عندنا في الكلية في الامتحانات و لا الإرهابين إللي بيقول عليهم بابي إنهم بيبقوا بدقن و لابسين حجاب و الحاجات دي .. يبقى أكيد ربنا غضبان عليهم عشان يخليهم كده .. فأنا من رأيي إن الموضوع دا تنسيه خالص و خلصت المسألة على كده ..

قالت دينا:طب لو عرفتي إن الحجاب دا فرض من ربنا .. و إنه غضبان مننا لإننا مش بنسمع كلامه .. برضو موقفك هيبقى كده؟

لم تعرف نادين كيف ترد على صديقتها دينا في هذا الأمر ..فطلبت منها أن تعطيها الشريط هذا و تسمعه و تحكم عليه مرة أخرى .. فمن الممكن أن يكون لديها حق في الأمر .

و إلى لقاء آخر في الجزء الثاني من ..

محجبة .. رغم أنوفهم